Chaudry sarwar ka har itwar ko Governor House awam kay liye kholnay ka elaan.

Lahore: Governor Punjab chaudry sarwar nay har itwar ko Governor House awam kay liye kholnay ka elaan kardiya aur kaha kay Governor House awam ki milkiyat hai, ab ameer ghareeb say baraber hain, na insafi kay khilaaf jahad karengay.

Tafseelat kay mutabiq Governor Punjab Chaudry Sarwar nay press conference kartay huvay Punjab Governor House awam kay liye kholnay ka elaan kartay huvay kaha Governor House subha 10 say sham 6 bajay tak awam kay liye khula rahay ga.

Governor Punjab ka kehna tha kay pehlay marhalay main Governor House Families kay liye khola jayega, jo school yahan anay ki darkhwast karengay, inhen ijazat daingay, Imran khan ki hidayat par Governor House awam kay liye khol rahay hain.

Chaudry sarwar nay kaha kau Pakistan Ashrafia kay liye nahi balkay 20 crore awam kay liye banaya gaya, nainsafi kay khilaaf jihad jari rahay ga, sarkari imarten mulk ka asasah hain, Ehtesaab patwari ya sipahi kay bajaye uper ki satah say shuru hoga.

In ka kehna tha kay awam ko saaf paani, sehat sameet, bunyadi sahulatain farahim karengay, Governor house kay bajaye apnay ghar main hi rehnay ka irada hai.

Governor Punjab nay kaha Governor house awam ki milkiyat hai, ab ameer ghareeb say braber hain, na insaafi kay khilaaf jehad karengay.

Chaudry sarwar nay appeal ki shehri pani ka istemal kam kren, warna hamari zameenain banjar hojaingi, peenay ka saaf pani muhaiya kiya to hospital kay akhrajaat kam hojaingay, quom sehat mand hogi tab hi mulk taraqqi karega.

In ka mazeed kehna tha kay Governor House ka kharcha bhut hai, isay kam karna hai aur kafafiyat shari apnali hai, wazeer e alla Punjab din raat mehnat kar rahay hain, vo aaj subha bagair protocol commissioner house aye.